لاہور: قائد حزب اختلاف قومی اسمبلی شہباز شریف نے آئی ایم ایف کی شرائط پارلیمنٹ میں لانے کا مطالبہ کردیا اور کہا شرائط ،مذاکرات کی تفصیلات چھپانا بتارہا ہے دال کالی ہے۔

تفصیلات کے مطابق مسلم لیگ (ن) کے صدر اور قائد حزب اختلاف قومی اسمبلی شہباز شریف نے آئی ایم ایف کی شرائط پارلیمنٹ میں لانے کا مطالبہ کرتے ہوئے کہا ہے کہ ڈالرکی قیمت میں مسلسل اضافہ معیشت کیلئےتباہ کن ہے، تاریخ گواہ ہے ڈالر کی قیمت میں اضافے سے ہمیشہ مہنگائی بڑھی.

شہباز شریف کا کہنا تھا کہ ڈالر کی قیمت میں اضافے سے عوام کنگال ہورہے ہیں ، حکومت کو عوام کی حالت زار کا کوئی احساس نہیں، آئی ایم ایف سے معاہدہ ختم نہیں توپھر کیا طے ہواپارلیمنٹ کو بتایا جائے ، آئی ایم ایف شرائط ،مذاکرات کی تفصیلات چھپانا بتارہا ہے دال کالی ہے۔

مسلم لیگ (ن) کے صدر نے کہا کہ ڈالر کی قیمت میں اضافےسےقومی معیشت برباد،مہنگائی بےقابو ہوچکی جبکہ ڈالرمیں مسلسل اضافے پر حکمران مجرمانہ خاموشی اختیارکی ہے، حکومت کی خاموشی آئی ایم ایف سے درپردہ سمجھوتے کا نتیجہ ہوسکتا ہے۔

ان کا کہنا تھا کہ آئی ایم ایف شرائط ماننےکا نتیجہ قوم مہنگائی،بیروزگاری سےبھگت رہی ہے، ڈالر کی پروازثبوت ہے حکومت معاشی محاذمیں بری طرح ناکام ہوچکی ، معاشی تباہی،افراتفری قومی سلامتی کے تقاضوں کیلئےنیک فال نہیں۔